Hazrat Muftī Amjad 'Alī A'zmī Rahmatullāhi 'Alaih
Alqāb :
Sadrush Sharī'ah (Chief of Islamic Law), Badr e Tarīqat (Shining Moon of Tarīqah), Faqīh e A'zam (Expert of Islamic Jurisprudence).
Pas Manzar:
Āp kī wilādat 1296 Hijrī (1879 AD) me Ghausī, Āzamgarh (Uttar Pradesh) me huī.
Āp ke wālid kā nām 'Allāma Hakīm Jamāluddīn bin Maulānā Khudā-Bakhsh he.
Āp ne apne dādā ke pās bunyādi ta’līm hāšil kī.
Iske ba'd apne bare bhāī, Maulānā Muhammad Šiddīq se majīd ta’līm hāšil kī.
Phir āp ke bhāī ke mashware par āp ko Madrasa e Hanafiya (Jaunpūr) me bhejā gayā. Wahā Hazrat ‘Allāma Maulānā Hidāyatullāh Khān Rāmpurī se Dars e Nizāmī kī ta’līm hāšil kī.
Āp roz Ghausī se Āzamgarh tak aur phir wahā se Jaunpūr tak kā safar karte the.
Is ke ba’d Madrasatul Hadīth (Pilibhit) me Shaikh ul Muhaddisīn, ‘Allāma Maulāna Wašī Ahmad Sūratī, se Hadīth kī ta’līm hāšil kī, aur 1320 Hijrī (1902 AD) me āp ko sanad ‘atā kī gaī.
Āp ne Hakīm ‘Abdul Walī se ‘Ilm e Tibb (Medicine) sīkhā. Is ke ba’d āp 4 sāl tak (1323–1327 Hijrī) Madrasa e Muhaddīth e Suratī me mudarris rahe.
Phir āp ‘Azīmabād (Patnā) jākar 1 sāl tak marīzo kā ‘ilāj karte rahe.
Is ke ba’d Ā’lā Hazrat ne āp ko Bareilly bulākar Dārul ‘Ulūm Manzar e Islām me Mudarris kī zimmedārī dī aur sāth me ‘Maktaba e Ahle Sunnah’ (printing press) kī nigrāni kī zimmedārī dī aur ‘Jamāt e Razā e Muštafā’ ke Šadr (president) bhī banāyā.
Is ke ‘ilāwa āp Ā’lā Hazrat ko ‘Kanz ul Īmān fī Tarjamah al Qur’ān’ tayyār karne me bhī madad karte rahe, jo 1330 Hijrī (1911 AD) me mukammal huā.
1343 Hijrī (1924 AD) me āp Ajmer gaye aur Dārul ‘Ulūm Moīnīyah Usmānīyah me Šadr ul Mudarrisīn (headteacher) rahe.
1351 Hijrī (1933 AD) me āp Bareilly wāpas āye aur wahā 3 sāl tak rahe.
Phir Dadon (Aligarh) ke nawāb, Hāji Ghulām Muhammad Khān Sherwān, kī dā’wat par Dārul ‘Ulūm Hāfiziah Sherwāni me 7 sāl tak Šadr ul Mudarrisīn rahe.
Phir ek sāl Banaras me thehre.
Is ke ba’d 1364 Hijrī (1945 AD) me Dārul ‘Ulūm Manzar e Islām, Bareilly, me wāpas āye.
TAŠANNIF
‾‾‾‾‾‾‾‾‾‾‾‾‾‾‾‾‾‾‾‾‾‾
Āp kī likhī huī kitābo me se ye mash-hūr he:
(1) Bahār e Sharī’at
(2) Fatāwa Amjadīah
(3) Sharh Ma’āni ul Āthār.
‾‾‾‾‾‾‾‾‾‾‾‾‾‾‾‾‾‾‾‾‾‾
Āp ke mash-hūr Shāgird:
Sher Besha e Ahle Sunnat, ‘Allāma Hashmat ‘Alī Khān
Muhaddis e ‘A’zam e Pākistān, Maulānā Sardār Ahmad Khān
Hāfiz e Millat, Hazrat ‘Allāma ‘Abdul ‘Azīz Muhaddis e Murādabādī
Imām ul Nahw Šadr ul ‘Ulamā, ‘Allāma Ghulām Jīlāni Ā’zmī
Amīn e Sharī’at, Muftī Rafāqat Husain Kānpurī
‘Allāma Muhammad Muslihuddīn Šiddīqī
Mujāhid e Millat, Shaikh ‘Allāma Maulānā Habībur Rahmān
Shams ul ‘Ulamā, Qāzi Shamsuddīn Jaunpūrī
Faqīh e Ā’zam, Shaikh Muftī Sharīf ul Haqq Amjadī
Khair ul Azkiya, ‘Allāma Ghulām Yazdānī Ghausawī
Ra-īs ul Muhaddisīn, ‘Allāma Mubīnuddīn Amrohawī
Khalīl ul ‘Ulamā, Maulānā Muftī Khalīl Khān Barkātī
Fakhr ul Amāthil, ‘Allāma Muhammad Sulaimān Bhagalpurī
Maulānā ‘Abdul Haqq Mubārakpurī
Maulānā Muhammad Ilyās Siyālkotī
Maulāna Muftī Muhammad I’jāz Razwī.
‾‾‾‾‾‾‾‾‾‾‾‾
Āp ke Pariwār:
Āp kī 4 bīwīyā, 11 sāhabzāde aur 4 sāhabzādiyā he.
(1) Muhtarama Karīma Khātūn se 4 bete aur ek betī:
- Hakīm Shamsul Hudā
- Zubaida Khātūn
- Maulānā Muhammad Yahyā
- Shaikh ul Hadīs, ‘Allāma ‘Abdul Muštafā Azharī
- ‘Allāma ‘Atāul Muštafā
(2) Muhtarama Safiyunnisā Šahiba se 1 betī:
- Raīsa Khātūn
(3) Muhtarama Rābi’a Khātūn se 2 bete:
- Muhammad Ahmad
- Qāri Razā ul Muštafā
(4) Muhtarama Hājra Bībī se 5 bete aur 2 betīyā:
- Sa’īda Khātūn
- ‘Āisha Khātun
- Muhaddis e Kabīr, ‘Allāma Maulānā Ziā ul Muštafā Qādrī Amjadī
- Muhammad Šaheb
- Maulānā Sanā ul Muštafā
- Maulānā Bahā ul Muštafā
- Maulānā Fidā ul Muštafā.
Āp Ā’lā Hazrat Imām Ahmad Razā Khān Barelwī Rahmatullāhi ‘Alaih ke murīd aur khalīfa he.
Āp ke Khulfā:
(1) Hazrat Sher Beshā e Ahle Sunnat Mazhar e Ā’la Hazrat, ‘Allāmā Hashmat ‘Alī Khān
(2) Hazrat Muhaddis e Ā’zam e Pākistān, Maulānā Sardār Ahmad Khān
(3) Hazrat Hāfiz e Millat, ‘Allāma ‘Abdul ‘Azīz Muhaddis e Murādabādī
(4) Hazrat Faqīh e A’zam Sharah e Bukharī, Shaikh Muftī Sharīful Haqq Amjadī
(5) Hazrat Imām ul Nahw Sadr ul ‘Ulamā, ‘Allāma Ghulām Jīlānī Ā’zmī
(6) Hazrat Amīn e Sharī’at, Maulānā Muftī Sayyad Shāh Rafāqat Husain Kānpūrī
(7) Hazrat ‘Allāma Muhammad Mušlihuddīn Šiddīqī
(8) Hazrat Khair ul Azkiyā, ‘Allāma Ghulām Yazdānī Ghausawī
(9) Hazrat Maulānā ‘Abdul Haqq Mubārakpūrī.
‾‾‾‾‾‾‾‾‾‾‾‾‾‾‾‾‾‾‾‾‾‾
Āp ko 1337 Hijrī (1922 AD) me Hajj kī sa’ādat nasīb huī.
1367 Hijrī me, ek martaba āp Hazrat ‘Allāma Muhammad Mušlihuddīn Šiddīqī ke sāth Ahmedabād (Gujarāt, India) me Hazrat Shāh e ‘Ālam Rahmatullāhi ‘Alaih ke mazār par hāzir hue.
(Shāh e ‘Ālam kī masjid me 2 mubārak takht lagāye hue he, jis me se ek takht par Huzūr Rasūlullāh Šallallāhu ‘Alaihi Wasallam jalwa afroz hue the, aur dūsre par Hazrat Shāh e ‘Ālam Bāba tashrīf rakhte the aur madrasa me tālīm diyā karte the. Shāh e ‘Ālam Baba kī du’ā se in takhto ke nīche 2-2 rak’at nafl namāz parh kar du’ā karne wāle ko Allāh Ta’ālā dunyā aur ākhirat me bhalāī ‘atā farmātā he aur har jā-iz du’ā qubūl farmātā he.)
Dono hazrāt in takhto ke nīche namāz parh kar du’ā karke fārigh hue to Hazrat ‘Allāma Muhammad Muslihuddīn Šiddīqī ne apne pīr se puchā, “Huzūr, āp ne kyā du’ā māngi?” Āp ne farmāya, “Allāh Ta’ālā har sāl Hajj e Baitullāh kī sa’ādat nasīb farmāe.”
Yeh du’ā is tarah qubūl huī ke usī sāl safar e Hajj ke daurān āp kā wišāl ho gayā.
* * *
Ek Hadīth Sharīf me Huzūr Rasūlullāh Sallallāhu ‘Alaihi Wasallam ne farmāyā he:
“Jo Hajj ke liye niklā aur faut ho gayā to Qayāmat tak us ke liye Hajj kā sawāb likhā jāyega, aur jo ‘Umrah ke liye niklā aur faut ho gayā us ke liye Qayāmat tak ‘Umrah kā sawāb likhā jāyega.”
* * *
26 Shawwal 1367 Hijrī ko āp apnī bīwī ke sāth Hajj e Baitullāh ke safar par rawāna hue. Rawāna hone se pehle āp ne railway station par majme’ ke sāmne shāndār taqrīr farmāī.
Phir gārhi me, safar ke daurān, bārish kī wajah se āp kī tabiyat kharāb huī, aur Mumbai pohochne tak āp ko pneumonia ho gayā. Mumbai station par āp kā ‘ilāj shurū’ kiyā gayā, magar āp behosh ho gaye.
Huzūr Muftī e Ā’zam e Hind bhī Hajj ke liye jā rahe the. Āp lagātar Hazrat Sadr us Sharī’ah kī ‘iyādat ke liye āte the. Aur sāth me bohot sāre chāhne wāle bhi āte. Ek bār ek shakhs ne Ā’la Hazrat kī likhī huī na’t sharīf parhna shurū’ kiyā. Āp ne foran ānkhe kholī aur takye ke sahāre beyth kar adab ke sāth na’t e pāk sunī.
Huzūr Mufti e Ā’zam e Hind aur Hazrat Sadr us Sharī’ah ek sāth ek hī hawāi jahāz me Hajj ke liye rawāna hone wāle the. Magar āp kī bīmāri kī wajah se Huzūr Muftī e Ā’zam e Hind rawāna ho gaye. Us ke ba’d āp kī sehet aur zyāda kharāb ho gaī aur āp kā intiqāl ho gayā.
Āp kā wišāl 2 Zil Qa’dah 1367 Hijrī (6 September 1948 AD), 12:26 pm ko Pīr ke roz huā.
Āp kā mazār Ghausī, Āzamgarh (Uttar Pradesh) he.
Follow us.